Երևան
Հունիսին «ԿԱԶԱ» հիմնադրամում հաջողությամբ մեկնարկել են ֆրանսերենի ամառային անվճար արհեստանոցները, որոնց մասնակցում է շուրջ 30 երեխա։ 6-շաբաթյա այս դասընթացը վարում է Սորբոնի համալսարանի ուսանողուհի, ով այժմ կամավորում է մեզ մոտ։ Տեսողական արվեստի կիրառման շնորհիվ պատանիները մեծ հաճույքով սովորում են խոսել ֆրանսերեն:
Թեև 6 շաբաթում հնարավոր չէ ամբողջությամբ տիրապետել լեզվին, մեր նպատակն ավելի խորն է՝ բորբոքել հետաքրքրության կայծը, սերմանել սեր դեպի լեզուն և մոտիվացնել երիտասարդներին շարունակելու ուսումնառությունը ողջ կյանքի ընթացքում: Երեխաներն ու ծնողներն արդեն իսկ մեծ գոհունակություն են հայտնել:
Գյումրի
Հունիս ամսվա վերջին շաբաթները նշանավորվեցին մի շարք բացառիկ միջոցառումներով, որոնք նվիրված էին ֆրանսերեն լեզվին և բեմարվեստին։ Ոգեշնչող հանդիպումներ, հեղինակավոր մրցանակներ և նորարարական աշխատարաններ․ այս ամենը դարձավ կրթական և մշակութային հարուստ փոխանակումների գեղեցիկ առիթ։
Մարսելի և Երևանի քույր քաղաքների համագործակցության շրջանակում հունիսի սկզբին Parvis des Arts թատրոնը կազմակերպեց հանրային խոսքի արվեստին նվիրված մեկշաբաթյա ծրագիր։ Այս հրաշալի նախաձեռնությունն իր լավագույն արտահայտությունը գտավ մեր կենտրոնում անցկացված հատուկ օրվա ընթացքում։ Հեղինակ և բեմադրիչ Օլիվիե Առներան մեծ նվիրումով և ոգևորությամբ կիսվեց իր մասնագիտական փորձով։ Ջերմ և վստահության մթնոլորտում 12 մասնակիցներ համարձակությամբ յուրացրին հանրության առջև խոսք կառուցելու հիմնական սկզբունքները։ Այս կենդանի փորձառությունը ևս մեկ անգամ ապացուցեց, որ խոսքի արվեստը հզոր և ոգեշնչող ուժ է։
Հունիսի 11-ին մեր ֆրանսիացի կամավորները ավանդական «Մշակութային սրճարան» հանդիպումը վերածեցին լեզվական իսկական խաղահրապարակի։ Ծրագրում ընդգրկված էին թիմային արագության խաղեր, զվարճալի ու բուռն բանավեճեր, ինչպես նաև ֆրանսերեն բնորոշ արտահայտությունների մնջախաղ։ 15 մասնակիցները ոչ միայն ակտիվորեն ներգրավվեցին, այլև դրսևորեցին ստեղծագործական մտածողություն և հռետորական հմտություններ։ Միջոցառումը հնարավորություն տվեց տոնելու ֆրանսերեն լեզուն ազատ, ջերմ և ուրախ մթնոլորտում՝ լի շփումներով, ծիծաղով և ուսուցմամբ։
Մեծ հպարտությամբ ենք ներկայացնում մեր «Մարտին Փաշայան» թատերական նախագիծը։ Գյումրու թիվ 10 հիմնական դպրոցի մեր երկու թատերախմբերի 23 աշակերտները փայլուն մասնակցեցին Հայաստանում Ֆրանսիայի դեսպանության կազմակերպած #merci_հետո_կասես նախաձեռնությանը։ Նրանց ներկայացրած հինգ ստեղծագործական տեսանյութերի շնորհիվ դպրոցն արժանացավ պատվավոր երկրորդ մրցանակին։
Առանձնահատուկ շնորհավորանքի է արժանի մեր աշակերտուհի Գալինա Մովսիսյանը, որը ստացավ անհատական մրցանակ «Կախարդական հայելի» տեսանյութի համար։ Տեսահոլովակը ստեղծվել էր թատերախմբի ուսուցչուհի Անահիտ Ղազարյանի ինքնատիպ գաղափարի հիման վրա և բարձր գնահատականի արժանացավ։ Տոնական ընդունելության ընթացքում Ֆրանսիայի փոխդեսպանը շնորհակալություն հայտնեց ծրագրի թիմին և բարձր գնահատեց կատարված աշխատանքի ստեղծագործական ու ներշնչող բնույթը։ Օրն ավարտվեց ուրախ մթնոլորտում՝ բազմաթիվ պարգևներով մեր երիտասարդ տաղանդների համար, որոնք շարունակում են արժանապատվորեն տարածել ֆրանկոֆոնիայի արժեքները։
Վերջերս մեր ֆրանսախոս թատերախմբերի 21 աշակերտներ բացառիկ հնարավորություն ունեցան մասնակցելու ֆրանսիական հեղինակավոր Hallet Eghayan պարային ընկերության անցկացրած ինտենսիվ վարպետության դասերին։ Մեկ ամիս տևած նախապատրաստական աշխատանքի և արդյունավետ համագործակցության արդյունքը լիովին բացահայտվեց հանդիպման ընթացքում, որին ներկա էին ընկերության արտադրական ծրագրերի պատասխանատու Մայլիս Օլիեն և երկու տաղանդավոր պարուհիներ։
Արվեստագետների մասնագիտական առաջնորդությամբ մեր երիտասարդ դերասանները բացահայտեցին մարմնի լեզուն, շարժման արտահայտչականությունը և ստեղծագործական ազատությունը՝ կախարդական մթնոլորտում։ Այս փորձառությունը նրանց հնարավորություն տվեց հարստացնելու իրենց դերասանական խաղը պարի նրբագեղությամբ, կարգապահությամբ և արտահայտչականությամբ։
Մեր խորին շնորհակալությունն ենք հայտնում Hallet Eghayan պարային ընկերությանը, ինչպես նաև Պասկալ Մագեզյանին և «ԿԱԶԱ» հիմնադրամի ողջ թիմին՝ այս անմոռանալի և ոգեշնչող փորձառությունը հնարավոր դարձնելու համար։
