Տաթևիկ Բաղդասարյան

Հիմնադրամի տնօրեն

Տեղեկատվական տեխնոլոգիաների գործարար կառավարման մասնագետի որակավորում ունեցող Տաթևիկի «մինչԿԱԶԱյական» փորձը բազմազան է, սակայն մշտապես առնչվել է կրթության ոլորտին: 2010թ. Ռիչարդ Ստոլմանի՝ հիմնադրամի հրավերով Հայաստան այցը կազմակերպելու ընթացքում Տաթևիկը հասկացավ, որ «ԿԱԶԱ»-ն կառույց է, որի հետ ցանկություն ունի երկար աշխատելու, քանի որ արժեքներն ու աշխատաոճը համահունչ են իր սեփական մոտեցումներին: Այսպես սկսվեց նրա ուղին հիմնադրամում նախ որպես հեռավար ուսուցման թիմի անդամ, հետո՝ հաջորդաբար նույն թիմի պատասխանատու, «Էսպաս» կենտրոնի համակարգող, իսկ 2018թ.-ից ի վեր՝ հիմնադրամի տնօրեն:

Իր գործունեության դրդապատճառների մասին խոսելիս նկատում է. «Ես շատ սիրում եմ Հայաստանն ու այստեղ ինձ շատ լավ եմ զգում: Կարծում եմ՝ մեզ մոտ այնպիսի անգնահատելի բաներ կան, որոնք ուրիշ տեղերում գտնելը դժվար է: Եվ ինձ համար շատ կարևոր է կարողանալ այնպես անել, որ Հայաստանը դառնա մի երկիր, որտեղ շատերն են զգում իրենց այնպես, ինչպես ես՝ լավ, ապահով»:

«ԿԱԶԱ»-ում Տաթևիկը կարևորում է անձնական և մասնագիտական կատարելագործման հնարավորությունը, ինչպես նաև Հայաստանի իրական կարիքների վրա հիմնված ծրագրերի իրականացման փաստը, ինչի արդյունքում արձանագրվում են էական, ոգևորիչ արդյունքներ: «Միևնույն ժամանակ, «ԿԱԶԱ»-ում հնարավորություն ունես երազելու, այդ երազանքն իրականություն դարձնելու և անընդհատ ստեղծագործելու աշխատանքիդ մեջ»,- նշում է նա՝ ավելացնելով նաև «միջմշակութային և միջսերնդային հաղորդակցության հնարավորությունը, ինչը շատ հարստացնող է, և գիտակցությունը, որ կատարած աշխատանքն իմաստ ունի»:

Իսկ աշխատանքային միջավայրից դուրս վերջին տարիներին բացահայտել է ձիավարությունը, ինչն իսկապես փոխել է իր կյանքը:

Կարդալ ավելին

Աննա Չոփուրյան

Տնօրենի օգնական

Ֆրանսերենի մասնագետ Աննան «ԿԱԶԱ»-ում աշխատանքը սկսել է 2007թ.՝ որպես գործավար-թարգմանիչ, իսկ 2009թ.-ից հանդիսանում է հիմնադրամի տնօրենի օգնականը:

«Վարչական թիմի կատարած աշխատանքը հաճախ քիչ տեսանելի, սակայն շատ կարևոր է: Այն, ի թիվս այլ գործառույթների, ապահովում է կապը արտաքին աշխարհի հետ: Այդ նույն աշխարհում մեզ լուրջ կամ անլուրջ ընդունում են նաև այդ աշխատանքի շնորհիվ կամ պատճառով: Ես էլ փորձում եմ հնարավորինս գրագետ անել գործս:»,- նշում է Աննան:

Իսկ ինչ վերաբերում է հիմնադրամում տիրող մթնոլորտին՝ «Չեմ հիշում օր, որ դժկամությամբ գամ. «ԿԱԶԱ»-ն ընտանիք է, նման չէ այլ՝ սովորական գործատեղերին: Եթե մի օր ստիպված լինեմ այլ տեղ աշխատել, երևի մեծ շոկի կենթարկվեմ: Ուրախ եմ, գտել եմ ինձ, իմ տեղը, ինձ զգում եմ ինչպես ձուկը՝ ջրում»

Դե իսկ հիմնադրամի պատերից դուրս երիտասարդ մայրիկ Աննայի հետաքրքրությունները բազմաթիվ են ու բազմազան՝ ձեռագործ, կարուձև, մասնավորապես՝ կտորե գեղեցիկ տոպրակների պատրաստում, նկարչություն, խոհանոց, ճամփորդություն…

Կարդալ ավելին

Հռիփսիմե Թագվորյան

Գլխավոր հաշվապահ

Հռիփսիմեն «ԿԱԶԱ»-ի ամենաերկարամյա աշխատակիցն է. ընդունվել է աշխատանքի 2001թ.-ին, երբ գրասենյակում կար միայն մեկ համակարգիչ, ծրագրերի թիվը չէր անցնում 5-ը, իսկ աշխատակիցներինը՝ 10-ը: Այսօր առանց նրա հիմնադրամը պատկերացնել անհնար է:

«Փորձում եմ իմ գիտելիքների շրջանակներում այնպես անել, որ պատկան մարմինները չկարողանան նեղացնել մեր հիմնադրամին:»,- իրեն հատուկ հումորով նշում է Հռիփսիմեն, որն այժմ աշխատավարձ է փոխանցում ամսական արդեն ոչ թե 10, այլ 50 հոգու: «Ու մի բան էլ. միշտ հիշեցնում եմ՝ ով ինչ պիտի անի:»,- ծիծաղում է նա:

Հիմնադրամի աշխատաոճի մասին խոսելիս համարում է, որ բախտը շատ բերել է, քանի որ «ԿԱԶԱ»-ն իրեն տալիս է թափանցիկություն, արդարություն, համերաշխություն և հանգստություն: Իսկ աշխատանքից դուրս սիրում է գործել թոռնիկների և դուստրերի համար:

Կարդալ ավելին

Մելինե Սարգսյան

Վարչական գծով պատասխանատու

Մինչ վարչական գծով պատասխանատուի պարտականությունները ստանձնելը մասնագիտությամբ ֆրանսագետ Մելինեն 2002թ.-ից ի վեր հաջորդաբար եղել է գործավար-թարգմանչուհի, ծրագրերի համակարգող, տնօրենի ժամանակավոր պաշտոնակատար, ֆինանսական պատասխանատու:

«Եթե վարչական թիմը ժամանակին և պատշաճ որակով չապահովի ողջ գրագրությունը և ծրագրերի հետ առնչվող կազմակերպչական այլ գործընթացներ, «ԿԱԶԱ»-ի ծրագրերը չեն կարող իրականացվել նման բարձր որակով և մակարդակով:»,- նկատում է Մելինեն առանց կեղծ համեստության:

Զարգանալու և աճելու հնարավորություն, նոր մտածելակերպ, նոր շունչ, նոր ծանոթություններ, ինքնադրսևորվելու և ինքնաարտահայտվելու նոր հնարավորություն՝ ահա թե ինչ է տվել հիմնադրամը Մելինեին այս բոլոր տարիների ընթացքում: «Ողջ գիտակցական կյանքս ու երիտասարդությունս կապված է հիմնադրամի հետ, և ինձ համար շատ դժվար կլինի մի օր պատկերացնել կյանքս առանց «ԿԱԶԱ»-ի:»,- անկեղծանում է նա:

Հանգստյան սիրելի զբաղմունքներն են թատրոնը, ընթերցանությունը, չնայած վերջին տարիներին ազատ ժամանակը հասցնում է նվիրել միայն ու միայն ընտանքին:

Կարդալ ավելին

Գեղամ Եղիազարյան

Ֆինանսական պատասխանատու

Հայաստանում ֆրանսիական համալսարանի շրջանավարտ Գեղամը «ԿԱԶԱ»-ի վարչական թիմին միացել է համեմատաբար վերջերս. ֆինանսների կառավարման և ֆինանսական վերահսկողության գործառույթների իրականացումը ստանձնել է 2017թ.-ին:

Հիմնադրամում իր աշխատանքի մասին խոսելիս կատակով նշում է. «Քանի որ արական սեռի ներկայացուցիչները քիչ են մեր թիմում, կարելի է ասել որ դա արդեն մեծ բան է: Իսկ եթե լուրջ, ապա իմ կարևորագույն ներդրումն եմ համարում ներդրումային եկամուտների աճը և ֆինանսների պլանավորումն ու խնայողությունները, որոնք միասին արտացոլվում են հիմնադրամի տարեկան արդյունքների մեջ:»

«ԿԱԶԱ»-ում հատկապես գնահատում է որոշումներ կայացնելու և աշխատաոճի ազատությունը: Իսկ ազատ ժամանակ սիրում է երաժշտություն լսել և ուսումնասիրել համաշխարհային ֆինանսական շուկաները:

Կարդալ ավելին

Լուսինե Աղաբեկյան

Մարդկային ռեսուրսների ղեկավար

Ինչպես «ԿԱԶԱ»-ի շատ աշխատակիցներ, Լուսինեն առաջին անգամ հիմնադրամում հայտնվել է որպես կամավոր՝ 2008թ․-ին։ 6 տարի հոգեբանական երիտասարդական ակումբը և հոգեբանական թեմաներով դասընթացներ վարելուց հետո՝ 2014թ.-ին ստանձնել է երիտասարդների զբաղվածության ծրագրի համակարգումը, իսկ այսօր արդեն զբաղվում է հիմնադրամի մարդկային ռեսուրսների կառավարմամբ:

««ԿԱԶԱ»-ն ունի հրաշալի թիմ՝ մարդիկ, որոնք իրականացնում են բոլոր ծրագրերն ու նախագծերը: Որպես մշտապես զարգացող կազմակերպություն՝ մեզ համար կարեւոր է, որ մեր աշխատակիցները ևս անընդհատ զարգանան, կարողանան լիարժեք օգտագործել իրենց ներուժն ու բավարարված լինեն իրենց աշխատանքով:»,- նշում է Լուսինեն, ով իր հիմնական խնդիրն է համարում մյուս աշխատակիցներին օգնելը, նրանց համար բարենպաստ աշխատանքային պայմաններ ստեղծելն ու նրանց ներուժի լիարժեք իրացմանը նպաստելը:

Եռանդով լի երիտասարդ մայրիկը զուգահեռաբար նաև դասախոսում և գիտական գործունեություն է ծավալում ԵՊՀ-ում, տարբեր կազմակերպություններում հանդես գալիս որպես հոգեբան և անկախ դասընթացավար։ Սակայն անգամ աշխատանքից դուրս նրա հիմնական հոբբին շարունակում են մնալ մարդիկ, նրանց բացահայտումն ու աջակցությունը․․․, ինչպես նաև թատրոնը՝ լինի որպես հանդիսատես, թե դերասան։

Կարդալ ավելին