Կարինե Ստեփանյան

Հիմնադրամի կրթական ծրագրերի պատասխանատու,
«Էսպաս» կենտրոնի համակարգող

Կրթությամբ ֆրանսերենի մասնագետ և մանկավարժ Կարինեի համար «ԿԱԶԱ»-ն եղել է առաջին աշխատավայրը, որտեղ, սակայն, 2010թ․-ից ի վեր հասցրել է բազմազան փորձ ձեռք բերել՝ հաջորդաբար լինելով գործավար, զբոսավարների պատրաստման դասընթացի, ուսուցանողների պատրաստման դասընթացի, քաղաքացիական կրթության ծրագրի պատասխանատու, աշխատել երիտասարդների միջոցով համայնքների զարգացման ծրագրում, մասնակցել կրթական խաղերի մշակման աշխատանքներին։ Իսկ 2018թ․-ից ստանձնել է «Էսպաս» կենտրոնի և հիմնադրամի կողմից իրականացվող կրթական ծրագրերի համակարգումը։

Հիմնադրամում նա հատկապես գնահատում է օգտակար աշխատանք անելու զգացողությունը, շահառուների կարիքներին առավելագույնը պատասխանելու նպատակով նորարարական մեթոդների կիրառումն ու փորձարկումներ անելու ազատությունը։ «Մինչ համակարգողի գործառույթները ստանձնելը շատ ուղղակիորեն աշխատում էի երիտասարդների հետ քաղաքացիական կրթության ծրագրի շրջանակներում և ամեն անգամ հետադարձ հայացքով երազում, որ երբ ուսանող էի, ես էլ հնարավորություն ունենայի նման ծրագրի մասնակցել»,- նշում է Կարինեն, ով մշտապես մտածում է կենտրոնն առավել երիտասարդական և հյուրընկալ դարձնելու մասին, որպեսզի յուրաքանչյուր այցելու այստեղ գտնի իրեն ոգեշնչող միջավայր։

Իսկ հիմնադրամից դուրս Կարինեի հետաքրքրությունները նույնքան բազմազան ու ստեղծագործական են, որքան եղել է նրա մասնագիտական ուղին «ԿԱԶԱ»-ում. Կարինեն նկարում է, կարում, տարբեր կիրառելի առարկաներ պատրաստում անպետք իրերից, զբաղվում «poi playing»-ով։

Կարդալ ավելին

Ամալյա Խաչատրյան

Կենտրոնի վարչական պատասխանատու

Մասնագիտությամբ ֆրանսագետ Ամալյան միացել է հիմնադրամի թիմին 2017թ․ սկզբին։ Կազմակերպչական և համակարգման տարատեսակ գործառույթներից բացի նա նաև «Էսպաս»-ի «պատմագիրն» է և հիշողությունը․ Ամալյան է կազմում բոլոր ժողովների արձանագրությունները, որոնք թույլ են տալիս պահպանել և փոխանցել հիմնադրամի գործունեության ընթացիկ բոլոր մանրամասները։

«Համոզված եմ, որ ակտիվ երիտասարդությունը կարող է ստեղծել պայծառ ապագա, և դա արդեն մոտիվացնում է ավելի հաճույքով աշխատել, մանավանդ՝ նման բազմամշակութային հետաքրքիր միջավայրում»,- նշում է Ամալյան՝ կարևոր համարելով «ԿԱԶԱ»-ի մարդասիրական բազմաոլորտ առաքելության մեջ սեփական լուման ներդնելու գիտակցումը։

Իսկ աշխատանքից դուրս ողջ ժամանակը տրամադրում է որդիներին․ այլ կերպ ասած՝ զբաղվում է նվազագույնը և՛ սպորտով, և՛ մանկավարժությամբ։

Կարդալ ավելին

Վահրամ Պետրոսյան

Քաղաքացիական կրթության ծրագիր

Մինչ հիմնադրամի թիմին միանալը ծրագրերի կառավարման մասնագետ Վահրամը համակարգել է Վորլդ Վիժն Հայաստանի Լոռու մարզային երիտասարդական ծրագրերը: Իսկ 2019թ. սեպտեմբերից ի վեր նա «Հայաստանի երիտասարդ քաղաքացիներ» ծրագրի պատասխանատուն է «ԿԱԶԱ»-ում:

«Համոզված եմ, որ համայնքը սկսվում է մեզնից յուրաքանչյուրից, ինչպես համոզված եմ, որ երիտասարդներն են այն շարժիչ ուժը, որոնք կարող են և պետք է նախաձեռնեն դրական փոփոխություններ: Ուրախ եմ, որ հնարավորություն ունեմ իրականացնելու այնպիսի ծրագիր, որը միտված է իսկապես փոխելու իմ Հայաստանը և այն մի փոքր ավելի լավը դարձնելու մեր և մեր երեխաների համար:»,- նշում է Վահրամը:

«ԿԱԶԱ»-ն Վահրամի համար առաջին հերթին այն ամբողջ թիմն է, որի հետ ամեն օր աշխատում է. հատկապես գնահատում է նրանց սերը, նվիրվածությունը, թիմային ուժն ու մարդկային արժեքները: Իսկ աշխատանքից դուրս սիրում է ժամանակ անցկացնել ընտանիքի հետ բնության գրկում, քանի որ ընտանիք-բնություն համադրությունն այն միջավայրն է, որում, իր խոսքերով, իսկապես կարողանում է լիցքավորվել:

Կարդալ ավելին

Մարիամ Ալեքսանյան

Քաղաքացիական կրթության ծրագիր

Միջազգային հարաբերությունների բակալավրի և միջազգային քաղաքական տնտեսության մագիստրոսի աստիճաններ ունեցող Մարիամը հիմնադրամի թիմին է միացել 2019թ. օգոստոսին: Նա համակարգում է քաղաքացիական կրթության խթանման ծրագրի շրջանակներում ձևավորվող երիտասարդական հարթակների գործունեությունը:

«Հասարակության մեծ շերտ կազմող երիտասարդների ունեցած խնդիրները վերհանող և նրանց սոցիալ-տնտեսական ներուժի ճիշտ օգտագործումն ու քաղաքացիական մասնակցության բարձրացումն ապահովող ռազմավարությունների մշակումը առաջնային աշխատանքային նպատակ է ինձ համար: Բացի այդ, ուզում եմ տեսնել ակտիվ ու գիտակից երիտասարդների, որոնց նայելիս մեծահասակները վերջապես կարտասանեն բաղձալի «էս ի՜նչ լավ նոր սերունդ ա գալիս» արտահայտությունը»,- կատակում է Մարիամը:

Հիմնադրամում իր զբաղվածության մեջ գնահատում է հատկապես երիտասարդների համակողմանի զարգացմանը նպաստելու, ինչպես նաև Հայաստանի տարբեր համայնքներ ճամփորդելու և անընդհատ նորը սովորելու, յուրահատուկ մարդկանց հետ աշխատելու եզակի հնարավորությունը:

Դե իսկ աշխատանքից դուրս սիրում է սպորտ և ընթերցանություն. հնարավորության դեպքում վազում է, կարդիո վարժություններ անում կամ կարդում է «ծանր» քաղաքագիտական գրքեր՝ երազելով մի օր Բեռլինի սրճարաններից մեկում հանդիպել Անգելա Մերկելին ու զրուցել նրա մշակած սոցիալ-տնտեսական ռազմավարության մասին:

Կարդալ ավելին

Նաիրա Մխիթարյան

Կենսակայուն զարգացման ուսուցման ծրագիր

2013թ․ Նաիրան «ԿԱԶԱ» մուտք գործեց նախ որպես կամավոր, ապա ներգրավվեց երիտասարդների քաղաքացիական կրթության ծրագրի թիմում, իսկ 2019թ.-ից ի վեր միևնույն՝ ոչ ֆորմալ կրթության մեթոդաբանությամբ աշխատում է ուսուցիչների և միջնորդավորված կերպով նաև նրանց աշակերտների հետ՝ կենսակայուն զարգացման մասին տեղեկացվածության մակարդակի բարձրացման և բնասիրական արժեքների ու վարքագծի ձևավորման ուղղությամբ:

«Մեր շրջակա միջավայրի՝ ահագնացող տեմպով աճող գլոբալ խնդիրներին զուգընթաց (որին, Նաիրայի համոզմամբ, հանգեցրել է ինքներս մեզ, այլ մարդկանց և բնության հետ հարաբերություններում հետևողականության կորուստը) մեր կրթական համակարգի համար հրատապ է դառնում գլոբալ համատեքստում իրազեկվածությունը երկիր մոլորակին և նրա բնակիչներին սպառնացող խնդիրների, դրանց լուծման միջազգային մոտեցումների մասին և այն պատասխանատվության, որ կրում է յուրաքանչյուրս այդ խնդիրների լուծման ճանապարհին։»,- նշում է Նաիրան:

Հիմնադրամի և դրանում իր գործունեության մեջ նա հատկապես գնահատում է որպես մոլորակի քաղաքացի պատասխանատվության իր հատվածը ստանձնելու և գործելու հնարավորությունը, ինչպես նաև ցանցային աշխատանքը, մասնակցային և մարդակենտրոն մոտեցումն ու աշխատանքային սկզբունքները։

Իսկ «ԿԱԶԱ»-ից դուրս նրա ամենամեծ հոբբին շարունակում է մնալ մասնագիտությունը՝ հոգեբանությունն իր տարբեր դրսևորումներով՝ հոգեբանական թատրոն, մանկական հոգեբանի աշխատանք հաշմանդամություն ունեցող երեխաների հետ, ու ինչպես ինքն է ասում՝ «էլի լիքը բաներ»։

Կարդալ ավելին

Գևորգ Էլվաջյան

Զբաղվածության ծրագիր

Կրթությամբ հոգեբան Գևորգը «ԿԱԶԱ»-ում մասնագիտական ուղին սկսել է 2016թ․ և հանդիսանում է երիտասարդների զբաղվածության ծրագրի պատասխանատու: «Հավատում եմ, որ հնարավոր է գտնել ցանկալի աշխատանք»,- նշում է Գևորգը, որի աշխատանքային փորձը ևս աչքի է ընկնում բազմազանությամբ՝ սրճարան, զանգերի կենտրոն, դպրոց։ Նա առիթը բաց չի թողնում իր այդ մտքով վարակելու նաև ծրագրի շահառուներին ու մոտիվացնելու՝ շարունակել աշխատանքի փնտրտուքները։

Հիմնադրամի ներսում Գևորգը գնահատում է մարդկանց, աշխատանքային մշակույթը, ինքնակատարելագործման և ինքնիրացման համար ընձեռված մշտական հնարավորությունն ու հիմնադիրների հետ ոչ հաճախակի, սակայն շատ բան սովորելու առիթ տվող շփումները։

Իսկ աշխատանքային թոհուբոհից հանգստանում է՝ հեծանվով Երևանում զբոսնելով կամ բնության գրկում վրանային արշավների մասնակցելով։

Կարդալ ավելին

Մարինե Թունյան

Փախստականների ինտեգրում կրթության միջոցով

Քաղաքագետի և անգլերենի մասնագետի, ապա նաև կրտսեր ֆինանսիստի որակավորումներ ունեցող Մարինեն «Էսպաս»-ի ամենաերկարամյա աշխատակիցն է, որն ականատես և մասնակից է եղել կենտրոնի գործունեության զարգացմանը։ Տարիների ընթացքում իրականացնելով տարատեսակ գործառույթներ՝ վերջին տարիներին նա մասնավորապես համակարգում է ՄԱԿ ՓԳՀ-ի հետ համագործակցությամբ իրականացվող ծրագիրը՝ ուղղված տեղահանված անձանց ինտեգրմանը Հայաստանում կրթության և կենսապայմանների բարելավման միջոցով։

«Բարեփոխել համերկրացիներիս կենսապայմանները, խթանել դրական մտածողություն և նախաձեռնողություն, հավատ սերմանել վաղվա ավելի լավ ապագայի նկատմամբ, նպաստել գրագետ և մտածող սերնդի ու քաղաքացիական հասարակության կայացմանը»․ ահա այն նպատակները, որոնք Մարինեի համար եղել և մնում են հիմնադրամում նրա համակարգած բոլոր ծրագրերի հիմքում։

Իսկ հիմնադրամից դուրս կյանքը գունեղ ու բազմազան են դարձնում նկարչությունը, յոգան և դրանց տարրերը միավորող սեփական բիզնեսի առաջխաղացումը։

Կարդալ ավելին

Զարինե Հարությունյան

Փախստականների սոցիալ-մշակութային ինտեգրում

Զարինե Հարությունյանն իր առաջին քայլերը «ԿԱԶԱ»-ում սկսել է 2012թ․՝ որպես Մարդու իրավունքների ակումբի ակումբավար։ Այսօր նա հաջողությամբ համակարգում է տեղահանված անձանց (էթնիկ հայ և օտարազգի)՝ հայաստանյան հասարակությունում սոցիալ-մշակութային ինտեգրմանն ուղղված մի շարք ծրագրեր։ Զարինեն խորապես համոզված է, որ «փախստականները մեծ ներուժով են գալիս Հայաստան, և մենք պետք է օգնենք նրանց այդ ներուժն իրացնել մեր երկրում: Բացի այդ, ցանկանում եմ, որ այդ մարդիկ Հայաստանում գոնե մի տեղ ունենան, որտեղ կարող են ազատ և հարմարավետ զգալ իրենց, կիսվել մտահոգություններով, խնդիրներով, նպատակներով»։

Մարդու իրավունքների և ժողովրդավարության ոլորտում իր ունեցած գիտելիքներն ու մասնագիտական հմտությունները (նա ակումբավարության արդյունքում ստեղծված «Մարդու իրավունքների ուսուցման կենտրոն» ՀԿ-ի համահիմնադիր և դասընթացավար է), ինչպես նաև միջմշակութային հաղորդակցության և մասնավորապես՝ սիրիահայերի հետ շփման ոլորտում կուտակած մեծ փորձը Զարինեն ներդնում է նաև հիմնադրամի կողմից ստեղծվող կրթական խաղերի մշակման գործում։

«ԿԱԶԱ»-ում բարձր է գնահատում ծրագրերի իրագործման ճանապարհին պատասխանատուներին տրվող ստեղծագործելու ազատությունն ու ինքնուրույնությունը։ Իսկ աշխատանքից դուրս հետաքրքրվում է արևելյան փիլիսոփայությամբ ու Հայաստանում քաղաքային այգեգործության առաջխաղացմամբ՝ իր գործընկեր Լուսինե Տոնոյանի հետ ստեղծած «Էկոմոտիվ» նախաձեռնության միջոցով։

Կարդալ ավելին

Լուսինե Տոնոյան

Փախստականների տնտեսական ինտեգրում

Ագրոբիզնեսի և շուկայաբանության մագիստրոսի աստիճան ունեցող Լուսինեին «ԿԱԶԱ» բերեց նախ Հայաստանում ապաստան գտած սիրիահայ փախստականներին կամավորության միջոցով ծառայելու ցանկությունը, որոնց շրջանում հասցրել էր ընկերներ ձեռք բերել և հաղորդակից լինել նրանց տարատեսակ խնդիրներին ու դրանց տրվող «ցաքուցրիվ» լուծումներին։ 2014թ․ Լուսինեն արդեն համալրեց հիմնադրամի աշխատանքային թիմը և մինչ այժմ համակարգում է տեղահանված անձանց՝ կրթության միջոցով տնտեսական ներգրավմանն ուղղված ծրագիրը։ Ավելին՝ այս ընթացքում Լուսինեն հասցրել է առավել հմտանալ՝ ստանալով սոցիալական աշխատողի որակավորում։

«Կարևոր եմ համարում կրթության միջոցով երկարաժամկետ ներդրում և իրական ազդեցություն ունենալու փաստը շահառուների կյանքում, որոնց մի մասի համար ստացած մասնագիտական կրթությունն առաջին ուսումնական փորձառությունն է իրենց կյանքում»,- նշում է Լուսինեն՝ խոսելով հիմնադրամում իր գործունեության մասին։ Իսկ դրանից դուրս նա մասնակցում է արշավների, սովորում արևելյան պարեր ու խնամում իր բնակարանի 60-ից ավելի բույսերը (որոնցից որոշներ հանգրվան են գտել հիմնադրամի «Էսպաս» կենտրոնում)՝ միևնույն ժամանակ ջանալով զարգացնել երկրում «կանաչ մտածողությունն» ու քաղաքային այգեգործությունը «Էկոմոտիվ» սոցիալական ձեռներեցության ծրագրի միջոցով։

Կարդալ ավելին

Լուսինե Սաղաթելյան

Զբոսավարների պատրաստման դասընթաց

Մասնագիտությամբ զբոսավար և թարգմանիչ Լուսինեն «ԿԱԶԱ»-ի՝ զբոսավարների պատրաստման դասընթացի համակարգումը ստանձնել է 2015թ․։ «Հստակ պատկերացնելով զբոսավարի դերը՝ ինձ հաճույք է պատճառում այն միտքը, որ կարող եմ զբոսավարության ոլորտն ավելի արհեստավարժ դարձնելու և ընդհանրապես՝ Հայաստանը հավուր պատշաճի ներկայացնելու գործում ունենալ փոքրիկ դերակատարություն»,- նշում է Լուսինեն։

Հիմնադրամի աշխատաոճում նա ամենաշատը գնահատում է ինքնուրույն և ստեղծագործ աշխատանքի հնարավորությունը։ Իսկ ազատ ժամանակ զբաղվում է ճարտարապետության, գեղանկարչության ուսումնասիրությամբ ու ընթերցանությամբ, հանգստյան օրերին էլ առավել սիրում է բնության գրկում ժամանակ անցկացնել դուստրերի հետ՝ անկախ եղանակից։

Կարդալ ավելին

Մարինե Նազարյան

Առցանց ուսուցում

Մարինեն «Էսպաս» կենտրոնում աշխատում է 2014թ․-ից ի վեր։ Ընդունվելով նախ որպես գործավարուհի՝ 2016թ․-ից նա միացել է հիմնադրամի առցանց ուսուցման թիմին։ Որպես «ԿԱԶԱ»-ի առցանց հարթակի պատասխանատու՝ Մարինեի գլխավոր առաքելությունն է վերջինս օգտատերերի համար դարձնել հնարավորինս մատչելի, գրավիչ և որակյալ բովանդակությամբ լեցուն։ «Ինձ համար ոգևորիչ է մարդկանց ուղղորդել դեպի համացանցի միջոցով կրթություն ստանալու անսահմանափակ հնարավորությունների բացահայտում»,- նշում է նա։

Հիմնադրամում Մարինեն կարևորում է աշխատակիցների՝ մշտապես գնահատված լինելու փաստը և այն վստահությունը, որ ամեն ինչ հնարավոր է, եթե կա ինչ-որ բան փոխելու ցանկություն և մի քիչ էլ՝ նախաձեռնողություն։ Իսկ «ԿԱԶԱ»-ից դուրս սիրում է ժամանակ անցկացնել անվերջ փնտրելով նոր երգեր, նկարել, հեծանիվ քշել, ժամանակ առ ժամանակ էլ՝ համեղ խմորեղեն պատրաստել։

Կարդալ ավելին

Գայանե Սարգսյան

Առցանց ուսուցում

Առաջին մասնագիտությամբ ճարտարագետ-տեխնոլոգ Գայանեն 2006թ. ի վեր զբաղվում է համակարգչային ցանցերով ու ծրագրավորմամբ: Հիմնադրամի թիմին միացել է 2015թ.: Նա է ապահովում «ԿԱԶԱ»-ի համակարգչային ցանցի բնականոն աշխատանքը, ուսուցման հարթակի տեխնիկական աջակցությունը, հիմնադրամի կայքի տեխնիկապես պատշաճ ներկայացումը:

«Աշխատանքս շատ եմ սիրում, քանզի այն թույլ չի տալիս տեղում մնալ, ստիպում է քեզ միշտ զարգանալ, պրպտումների մեջ լինել, ջահել մնալ»,- նշում է Գայանեն, ով հավատում է, որ ոչ մի հանդիպում կյանքում հենց այնպես չի տրվում, այդ թվում իր՝ «ԿԱԶԱ»-ի թիմի մաս կազմելը:

Հիմնադրամում գնահատում է վստահությունն իր ու իր կատարած գործի նկատմամբ, ինչպես նաև աշխատանքում տրվող ազատությունը, ինչը ստիպում է իրեն առավել պատասխանատու և պարտաճանաչ լինել:

Իսկ աշխատանքից զատ սիրում է ընթերցել, ընկերուհիների հետ ճամփորդել Հայաստանով մեկ և, իհարկե, ապրել սիրելի որդու հետաքրքրություններով:

Կարդալ ավելին